Dowladda Federaalka Soomaaliya ayaa wada-hadallo la gashay Shirkaddaha Isgaarsiinta ee dalka, si kor loogu qaado Tayada iyo helitaanka adeegyada isgaarsiineed. Ujeeddada kulanka ayaa ahaa in la xoojiyo iskaashiga dowladda iyo shirkaddaha gaarka loo leeyahay, lana horumariyo adeegyada intarnetka iyo isgaarsiinta casriga.
Tallaabadaan ayaa ah mid lagu rajeynaayo in ay gacan ka geysato kobcinta dgaqaalaha iyo fududeynta isgaarsiinta shacabka Soomaaliyeed, taas oo ah mid sanaddihii la soo dhaafay si xowli ah u soo if-baxeesay.
Bishaani Oktoobar ee daba-yaaqada ah, dowladda Soomaaliya waxaa ay bilowday wada-tashi qaran oo ku saabsan Istaraajiyadda Isbeddelka Dhijitaalka ee dalka (2025-2030). Ujeeddada qorshahaan, waa in lagu horumariyo adeegyada dhijitaalka ah, lana xoojiyo isku-xirka bulshada iyo hay’addaha dowladda.
Wada-tashigaan waxaa lagu sameeyay, iskaashi dhex-maraayo Dowladda Soomaaliya iyo Ururka Isgaarsiinta Caalamka (ITU). Iskaashigaan ayaa diiradda lagu saaraayaa, sidii loo dhisi lahaa kaabayaasha dhijitaalka iyo kor-u-u-qaadista xirfaddaha dhijitaalka ee dhalinyarada.
Istaraajiyadda cusub waxaa ay sida oo kale ka shaqeyn doontaa kobcinta dhaqaalaha dhijitaalka, abuurista shaqooyin cusub iyo hagaajinta adeegyada dowladda ee intarnetka ku saleysan. Tani, waa tallaabo muhiim ah oo loo qaaday horumarinta Soomaaliya ee dhanka dhijitaalka.
Bishii Abriil ee sanadkaan horaantiisa, Dowladda Soomaaliya ayaa waxaa ay siisay Starlink ruqsad rasmi ah, si ay uga howl-gasho dalka. Tani, waxaa ay ka dhigan tahay tallaabo muhiim ah oo lagu horumarinaayo adeegyada intarnetka ee dalka oo dhan. Starlink ayaa caan ku ah bixinta intarnetka sataleytka oo xawaaro sare leh.
Intarnetka Starlink, waxaa uu gacan ka geysan karaa kor u qaadista wax-barashada, caafimaadka iyo ganacsiga, maadaama ay suurto-gal tahay taghay in adeegyadaas lagu helo meel sare. Tani, waxaa ay kor u qaadeysaa isku xirnaanta bulshada Soomaaliyeed.
Bishii Julaay ee sanadkaan, Wasaaradda Boostada iyo Isgaarsiinta, ayaa heshiis iskaashi la gashay Barnaamijka Horumarinta Qaramada Midoobay (UNDP), si kor loogu qaado adeegyada elektoroonikada ee Dowladda Soomaaliya.
Heshiiskaan, waxaa uu diiradda saaraayaa dhismaha hay’addaha dowladda iyo horumarinta xirfadaha dhijitaalka ee shaqaalaha, kaas oo gacan ka geysanaayo isbeddelka dhijitaalka ee dalka.
